Miale ya Hatima
Sehemu ya Tatu
Mwandishi:YOUNG NDABA DE LILIAN
Usiku ulikuwa mzito, na msitu wa Kinundu ulionekana kama maze ya giza lililokuwa likiwaficha Zuwena na Yusufu kutoka kwa wale waliokuwa wakiwafuatilia. Mwanga wa mwezi ulijitahidi kupenya kupitia matawi mazito ya miti, lakini haukuwatosha kuwaonyesha njia wazi.
“Huyu Bibi Kiza ni nani hasa?” Zuwena aliuliza huku akihema kwa taabu, miguu yake ikikwama mara kwa mara kwenye mizizi ya miti iliyojitokeza ardhini.
"Yeye ni mlinzi wa hazina hii ya miale. Ni yeye pekee anayejua siri kamili ya ramani hiyo," Yusufu alijibu huku macho yake yakiangaza mbele kama simba anayefuatilia mawindo. "Lakini usifikirie atatufanya iwe rahisi. Kuna maswali mengi atayokuuliza, na kama hutatoa majibu sahihi, hatutapata chochote."
Zuwena alihisi baridi ikipenya mpaka kwenye mifupa yake. "Na kama tusipofanikisha safari hii?"
Yusufu alisimama ghafla na kumtazama Zuwena kwa macho yenye tahadhari. "Kama tusipofanikiwa, wale waliotufuatilia watafanikiwa. Na wakipata miale hiyo, hakutakuwa na Kinundu tena. Wataharibu kila kitu kwa tamaa yao ya nguvu."
Hawakusema tena. Walitembea kwa haraka, wakitumia ramani kuelekea mahali ramani ilipoonyesha kwa makadirio. Dakika chache baadaye, walifika kwenye nyumba ndogo ya matope iliyoonekana imejificha kati ya miti mirefu. Mlango wake ulikuwa umefunikwa kwa magome, na moshi hafifu ulitoka juu ya paa lake la nyasi.
“Hapa ndipo anakaa,” Yusufu alisema kwa sauti ya chini. “Kuwa tayari kwa chochote.”
Waligonga mlango kwa tahadhari, na sekunde chache baadaye, mlango ulifunguliwa taratibu, ukitoa mlio wa kutisha. Mwanamke mzee, aliyevaa shuka jeupe lililochakaa, alijitokeza. Nywele zake zilikuwa zimejaa mvi, na macho yake makubwa yalionekana kuwa na uwezo wa kuona ndani ya nafsi za watu.
“Mnataka nini usiku huu?” aliuliza kwa sauti iliyokuwa kali lakini tulivu.
“Tumekuja kwa msaada wako, Bibi Kiza,” Yusufu alisema huku akiinamisha kichwa chake kwa heshima.
Macho ya Bibi Kiza yalitembea kutoka kwa Yusufu hadi kwa Zuwena. “Msaada? Dunia hii imejaa watu wanaotafuta msaada kwa ajili ya tamaa zao. Kwa nini niwasaidie?”
Zuwena alitoa ramani kutoka ndani ya koti lake na kumkabidhi. “Tumepewa ramani hii, na tunajua unajua siri ya miale inayozungumziwa hapa.”
Bibi Kiza alichukua ramani hiyo, akaiangalia kwa muda mrefu, kisha akatabasamu kwa namna ya kutatanisha. “Kwa muda mrefu nilijua siku kama hii itafika. Lakini unajua, miale hii haiko kwa ajili ya mtu yeyote. Lazima uthibitishe kuwa unastahili.”
“Tutafanya chochote kinachohitajika,” Zuwena alisema kwa ujasiri.
Bibi Kiza alikata macho yake kwa Yusufu na kusema, “Yeye hana ufahamu wote wa kile mnachokifanya, siyo?”
Zuwena aliangalia kwa mshangao. "Unamaanisha nini?"
"Yusufu anakuficha kitu," Bibi Kiza alisema, akitabasamu kwa hila. "Lakini utajua kila kitu kwa wakati wake."
Kabla Zuwena hajajibu, kelele za mbwa wakibweka zilisikika kutoka mbali, zikisogea kwa kasi. “Wanakuja!” Yusufu alisema kwa hofu.
“Hamtaondoka hapa na ramani hiyo peke yenu,” Bibi Kiza alisema. “Ili kuilinda miale, lazima mtu mmoja kati yenu ajitolee. Lazima uchaguzi ufanywe sasa.”
Zuwena alitazama Yusufu, lakini hakupata jibu. Mlango ulikuwa ukigongwa kwa nguvu sasa, ishara kwamba wale waliokuwa wakiwafuatilia walikuwa wamefika.
“Kufanya maamuzi ni sehemu ya safari,” Bibi Kiza alisema kwa sauti ya utulivu. “Sasa, mtafanya nini?”
Mwisho wa Sehemu ya Tatu
Maoni